November 2025

                                                மேற்கு மண்டலம்

நவம்பர் 6 போஜ்புரி 1 கோட்டத்தில் வேதம் வாசிக்கும் பழக்கத்தை விசுவாசிகள் மத்தியில் ஊக்குவிக்கவும் மற்றும் வேதத்தின் மீதுள்ள ஆர்வத்தினைப் பெருக்கவும் நடைபெற்ற வேதாகம வினாடி வினாப் போட்டியில், பணித்தள விசுவாசிகள் 300 பேர் உற்சாகமாகக் கலந்துகொண்டனர். விசுவாசிகளின் குடும்பத்திற்காகவும் மற்றும் பிள்ளைகள் கிறிஸ்துவின் சத்தியத்தில் வளர்க்கப்படவும் ஜெபிப்போம் .

நவம்பர் 7 பாபுவா பணித்தளத்தின் ஜெம்ஸ் செயல் மையத்தில் விசுவாசிகளுக்காக நடத்தப்பட்ட குடும்பக் கூடுகையில் 265 தம்பதியினர் பங்கேற்றனர்; சகோ. ரூபன் கிருஷ்ணமூர்த்தி மற்றும் சகோதரி ஜெயந்தி ஆகியோர் தேவ செய்தியைப் பகிர்ந்துகொண்டனர். பணித்தளங்களில், கிறிஸ்துவை தங்கள் வாழ்க்கையின் சொந்த இரட்சகராக ஏற்றுக்கொண்டோர், உடன்படிக்கையின் மூலமாக தங்கள் விசுவாசத்தை சபைக்கு வெளிப்படுத்தினர்; தேவனுக்கே மகிமை! பணித்தளங்களில் நடைபெறும் சுவிசேஷ ஊழியங்களுக்காகவும் மற்றும் வாலிபர் ஊழியங்களுக்காகவும் ஜெபிப்போம். 

நவம்பர் 8 போஜ்புரி-2 கோட்டத்தின் அனைத்து ஊழியர்களுக்கான மூன்று நாட்கள் உபவாச ஜெபம், செப்டம்பர் 30 முதல் அக்டோபர் 2 வரை நடைபெற்றது. ஊழியர்கள் குடும்பமாக கலந்துகொண்டு ஜெபத்திலும், சுயபரிசோதனையிலும் தங்கள் நேரத்தைச் செலவிட ஏற்ற தருணமாக அமைந்தது. உத்திரப்பிரதேசத்தில் ஊழியத்திற்கு உண்டாயிருக்கும் தடைகள் நீங்கவும், விசுவாசிகள் தங்கள் விசுவாசத்தில் நிலைத்துநிற்கவும் ஜெபிப்போம். 

நவம்பர் 9 கோடாரி பணித்தளத்தில் சமுதாய மையக் கட்டிடத்தினைப் புதுப்பிக்க கர்த்தர் கிருபை செய்தார். இப்பணித்தளத்தில், செய்யப்பட்டுவரும் ஊழியங்களுக்காகவும் மற்றும் கட்டப்பட்டுவரும் ஊழியர் இல்லத்திற்காகவும் ஜெபிப்போம். 

நவம்பர் 10 சசராம் பணித்தளத்தில் கட்டப்பட்டுவரும் ஜெம்ஸ் செயல்மையக் கட்டிடத்தின் பணிகள் எவ்விதத் தடையுமின்றி குறிப்பிட்ட நாட்களுக்குள் கட்டிமுடிக்கப்படவும், பெலாவன் பணித்தள ஆலயக் கட்டுமானப் பணிகள் இடையூறின்றி தொடர்ந்து நடைபெறவும் மற்றும் வரும் நாட்களில் பணித்தளங்களில் திட்டமிடப்பட்டிருக்கும் ஊழியங்களுக்காகவும் ஜெபிப்போம். 

October 2026

                                                  மேற்கு மண்டலம்

அக்டோபர் : 06 மஸிகாபாத் பணித்தளத்தில் ஆகஸ்ட் 30 அன்று நடைபெற்ற சமுதாய விழிப்புணர்வு முகாமில், பணித்தள மக்கள் 30 பேர் கலந்துகொண்டனர். கல்வியின் முக்கியத்துவைத்தைக் குறித்தும் மற்றும் வருங்காலத் தலைமுறையினருக்கான கல்வியின் அவசியத்தைக் குறித்தும் சகோதரி மகதலேனா எடுத்துரைத்தார். 

அக்டோபர் : 07 மேற்கு மண்டலத்தின் பல்வேறு பணித்தளங்களில் கிறிஸ்துவை தங்கள் வாழ்க்கையின் சொந்த இரட்சகராக ஏற்றுக்கொண்டு இரட்சிப்பின் அனுபவத்தைப் பெற்றோர், உடன்படிக்கையின் மூலமாக கிறிஸ்துவின் மீதுள்ள அன்பை சபைக்கு வெளிப்படுத்தினர். இவர்கள் தங்கள் விசுவாசத்தில் நிலைத்து நிற்கவும், சொந்த ஜனங்களுக்கு முன் கிறிஸ்துவைப் பிரதிபலிக்கும் சாட்சிகளாக வாழவும் ஜெபிப்போம். 

அக்டோபர் : 08  Peace 2 கோட்டத்தின் விசுவாசிகளுக்காக நடத்தப்பட்ட குடும்பக் கூடுகையை கர்த்தர் ஆசீர்வதித்தார். இக்கூடுகையில், பல்வேறு பணித்தளங்களைச் சேர்ந்த சுமார் 300 விசுவாசிகள் குடும்பமாகப் கலந்துகொண்டனர். சென்னையைச் சேர்ந்த சகோதரர் ஜான் சாமுவேல் இக்கூடுகையில் சிறப்புவிருந்தினராகக் கலந்துகொண்டு, கர்த்தருடைய வார்த்தையைப் பகிர்ந்துகொண்டார். பங்கேற்ற ஒவ்வொரு குடும்பத்தினருக்கும் இக்கூடுகை ஆசீர்வாதமாக அமைந்தது. தொடர்ந்து, செப்டம்பர் 14 அன்று எபேசியர் மற்றும் கலாத்தியர் புத்தகங்களிலிருந்து இக்கோட்டத்தில் நடைபெற்ற வேத வினாப் போட்டிகளில் 700 பேர் பங்கேற்றனர்; இது விசுவாசிகள் வேதவாசிப்பில் தொடர்ந்து ஊக்கமடைய வகைசெய்தது. 

அக்டோபர் : 09  சசராம் பணித்தளத்தில் ஜெம்ஸ் செயல் மையக் கட்டிடத்தின் அடித்தளப் பணிகள் நிறைவுற்று, அடுத்த கட்டப் பணிகள் நடைபெற்றுவருகின்றன. இப்பணிகள் வரும் நாட்களில் எவ்விதத் தடையுமின்றி நடைபெறவும், திட்டமிடப்பட்டுள்ள நாட்களில் செயல் மையம் கட்டிமுடிக்கப்படவும் ஜெபிப்போம். 

அக்டோபர் : 10 பெலாவன் பணித்தளத்தில் நடைபெற்றுவரும் பணித்தள ஆலயக் கட்டுமானப் பணிகள் எவ்வித இடையூறுமின்றி குறிப்பிட்ட நாட்களில் கட்டிமுடிக்கப்படவும், மேலும், பர்ஹரி பணித்தளத்தில் ஆலயம் கட்டப்படுவதற்காக ஏற்ற நிலம் விரைவில் வாங்கப்படவும், இப்பணித்தளங்களில் விரைவில் ஆலயங்கள் கட்டிமுடிக்கப்பட்டு ஜனங்கள் விடுதலையோடு தேவனை ஆராதிக்கவும் ஜெபிப்போம். 

SEP 2025

 

                                                       மேற்கு மண்டலம்

செப்டம்பர் 06 ஆகஸ்ட் 15 அன்று, B-1 கோட்டத்தின் ஊழியர்களுக்காக நடத்தப்பட்ட குடும்பக் கூடுகையில் 35 ஊழியர்கள் குடும்பமாகக் இக்கூடுகையில், சென்னையைச் சேர்ந்த சகோதரர் ஜான் சாமுவேல் சிறப்பு விருந்தினராக கலந்துகொண்டு கர்த்தருடைய வார்த்தையைப் பகிர்ந்துகொண்டார். பங்கேற்ற அனைத்து ஊழியர்களுக்கும் இக்கூடுகை ஆசீர்வாதமாக அமைந்தது. ஆவிக்குரிய வாழ்க்கையில் புத்துணர்ச்சி பெற்று, தேவ இராஜ்யத்தின் பணிகளைத் தொடர ஊழியர்களை இக்கூடுகை உற்சாகப்படுத்தியது.

செப்டம்பர் 07 முசஹர் சமூக மக்களது பொருளாதார நிலையினை மேம்படுத்தும் பொருட்டு, அவர்களுக்கு இலவசமாக ஆடுகள் விநியோகிக்கும் திட்டம் கோத் மற்றும் ஏக்ராசி ஆகிய இரண்டு  பணித்தளங்களில் நடைபெற்றது. தெரிந்தெடுக்கப்பட்ட 9 பயனாளர்களின் குடும்பத்திற்கு தலா 2 ஆடுகள் வழங்கப்பட்டன. இச்சமுதாய மக்களின் வாழ்க்கைத்தரம் மேம்படவும், வருங்காலச் சந்ததியினர் கல்வியறிவைப் பெறவும் மற்றும் இவர்கள் மத்தியில் செய்யப்படும் ஊழியங்கள் வாயிலாக கிறிஸ்துவை அறிந்துகொள்ளவும் ஜெபிப்போம். 

செப்டம்பர் 08 பணித்தளங்களில் இயேசு கிறிஸ்துவை தங்கள் வாழ்க்கையின் சொந்த இரட்சகராக ஏற்றுக்கொண்டோர் உடன்படிக்கையின் மூலமாக கிறிஸ்துவின் மேல் உள்ள தங்கள் விசுவாசத்தை சபைக்கு வெளிப்படுத்தினர்; தேவனுக்கே மகிமை! பெலாவன் பணித்தளத்தில் நடைபெற்றுவரும் சமுதாயப் பராமரிப்பு மையத்தின் கட்டுமானப் பணிகளை,  மேல்தளம் வரை செய்துமுடிக்க உதவியதற்காக ஆண்டவருக்கு நன்றி சொல்லுகின்றோம்;. இக்கட்டுமானப் பணிகள் விரைவில் எவ்வித தடையுமின்றி  திட்டமிடப்பட்டுள்ள நாட்களுக்குள் முடிக்கப்பட ஜெபிப்போம். 

செப்டம்பர் 09 சசராம் பணித்தளத்தில் நடைபெற்றுவரும் ஜெம்ஸ் செயல் மையத்தின் கட்டுமானப் பணிகள் எவ்வித தடையும் இன்றி குறிக்கப்பட்ட நாட்களுக்குள் திட்டமிடப்பட்டபடி கட்டிமுடிக்கப்படவும், இப்பணித்தள ஆலயத்திற்காகவும் மற்றும் விசுவாசிகளுக்காகவும், பர்ஹாரி பணித்தளத்தில் ஆலயம் கட்டப்பட ஏற்ற நிலம் கிடைக்கவும் ஜெபிப்போம். 

செப்டம்பர் 10 உத்தரப்பிரதேச மாநிலத்தில் நடைபெற்றுவரும் ஊழியங்களுக்கு உண்டாயிருக்கும் தடைகள் நீக்கவும்,  விடுதலையோடு ஜனங்கள் ஆலயத்தில் ஆண்டவரே ஆராதிக்கும் சூழ்நிலை உருவாகவும், இம்மாநிலத்தில் செயல்பட்டுவரும் ஜெம்ஸ் ஆங்கிலப் பள்ளிகளின் மூலமாக மாணவர்கள் மற்றும் பெற்றோர் கிறிஸ்துவை கண்டு கொள்ளவும், வாலிபர்கள், சிறுவர்கள் மற்றும் பெண்கள் மத்தியில் செய்யப்பட்டு வரும் ஊழியங்கள் நல்ல பலனை தரவும் ஜெபிப்போம்.

August 2025

 மேற்கு மண்டலம்

ஆகஸ்ட் 06  பாபுவா பணித்தளத்தில் நடைபெற்ற சுத்திகரிப்புக் கூட்டத்தில் 300 விசுவாசிகள் கலந்துகொண்டனர். சகோ. வின்சென்ட் ஜெயராஜ் கர்த்தருடைய செய்தியைப் பகிர்ந்து கொண்டார். பாதங்கழுவுதலுடனும் மற்றும் கர்த்தருடைய பந்தியுடனும் இக் கூடுகை நிறைவுபெற்றது. விசுவாசிகளின் பரிசுத்த வாழ்க்கைக்காகவும் மற்றும் ஆவிக்குரிய வளர்ச்சிக்காகவும் ஜெபிப்போம்.

ஆகஸ்ட் 07 போஜ்புரி -1 மற்றும் போஜ்புரி -2  ஆகிய கோட்டங்களில் நடைபெற்ற வேத வினா போட்டிகளில் 700 விசுவாசிகள் ஆர்வமுடன் பங்கேற்றனர்.  விசுவாசிகள் வேதத்தை கற்பதில் ஆர்வம் காட்டவும் விசுவாசத்தின் நிலைத்து நிற்கவும் தங்கள் குடும்பத்தினருக்குச் சாட்சியாக வாழவும், சமுதாயத்தினர் இவர்கள் மூலமாகக் கிறிஸ்துவைக் கண்டுகொள்ளவும் ஜெபிப்போம்.

ஆகஸ்ட் 08 பஹ்வான்பூர் ஜெம்ஸ் சமுதாய மையத்தில் நடைபெற்ற பெண்களுக்கானச் சிறப்புக்  கூடுகையை கர்த்தர் ஆசீர்வதித்தார். பஹ்வான்பூர், சந்த், ஹட்டா மற்றும் பிஹாரா ஆகிய பணித்தளங்களைச் சேர்ந்த 120 விசுவாசிகள் இக்கூடுகையில் பங்கேற்றனர். சகோதரி மாலினி வின்சென்ட் பெண்களின் வாழ்க்கைக்கு ஏற்ற ஆலோசனைகளையும் மற்றும் தேவ செய்தியையும் பகிர்ந்து கொண்டு, அவர்களுக்காக ஜெபித்தார். வரும் நாட்களில் பணித்தளங்களில் பெண்கள் சந்திக்கப்படவும், பெண்கள் மத்தியில் செய்யப்பட்டுவரும் ஊழியங்கள் நல்ல பலனைத் தரவும் ஜெபிப்போம்.

ஆகஸ்ட் 09 பெலாவன் பணித்தள ஆலயக் கட்டுமானப் பணிகள், எவ்விதத் தடையுமின்றி திட்டமிடப்பட்டக் காலத்திற்குள் கட்டி முடிக்கப்படவும், சசராம் பணித்தளத்தில் கட்டப்பட்டு வரும் ஜெம்ஸ் செயல்மையக் கட்டுமானப் பணிகளுக்காகவும், போஜ்புரி -1 கோட்டத்தில், கல்லறைத் தோட்டத்திற்கான நிலம் கிடைக்கவும் ஜெபிப்போம்.

ஆகஸ்ட் 10 பணித்தளங்களில், கிறிஸ்துவை தங்கள் வாழ்க்கையில் சொந்த இரட்சகராக ஏற்றுக் கொண்டவர்கள், உடன்படிக்கையின் மூலமாக தங்கள் விசுவாசத்தை வெளிப்படுத்தினர்; தேவனுக்கே மகிமை! சிறுவர்கள் மற்றும் பள்ளி மாணவர்கள் மத்தியில் நடைபெறும் ஊழியங்களுக்காகவும், கிராமங்களில் வரும் நாட்களில் செய்யப்படவிருக்கும் நற்செய்திப் பணி மற்றும் கைப்பிரதி ஊழியங்களுக்காகவும், வாலிபர் சிறப்புக் கூடுகைகளுக்காகவும் ஜெபிப்போம்.

July 2025

                                                            மேற்கு மண்டலம்

ஜுலை 07 துர்க்காவதி ஜெம்ஸ் செயல்மையத்தில் நடைபெற்ற மண்டல அளவிலான வாலிபர் கூட்டத்தில் பல்வேறு பணித்தளங்களைச் சேர்ந்த 75 வாலிப சகோதர சகோதரிகள் பங்கேற்றனர். பாடல்கள் மற்றும் ஆராதனையினைத் தொடர்ந்து, சகோ. வெண்ணிலவன் தேவ செய்தியைப் பகிர்ந்துகொண்டார். வாலிபத்தில் வாழ்க்கையின் இலக்கை நிர்ணயிப்பதைக் குறித்தும், வருங்காலத்தில் வாழ்க்கையை வடிவமைப்பதைக் குறித்தும் வழிகாட்டப்பட்டது. இக்கூட்டங்களில் பங்கேற்ற வாலிபர்கள் பணித்தளங்களில் தொடர்ந்து கிறிஸ்துவுக்கு சாட்சிகளாக வாழவும், வாழ்க்கையில் அவரை வெளிப்படுத்தவும் ஜெபிப்போம். 

ஜுலை 08 ஜுன் 14 அன்று ராம்கட் பணித்தளத்தில் நடைபெற்ற பெண்களுக்கான சிறப்புக் கூடுகையில் பல்வேறு பணித்தளங்களைச் சேர்ந்த 70 பெண்கள் கலந்துகொண்டு ஆசீர்வதிக்கப்பட்டனர். சகோதரி மாலினி வின்சென்ட் கர்த்தருடைய வார்த்தையைப் பகிர்ந்துகொண்டார். இக்கூடுகையில் கலந்துகொண்ட பெண்களுக்காகவும், குடும்பங்களில் அவர்கள் கிறிஸ்துவை பிரதிபலிக்கும் தீபங்களாகத் திகழவும் ஜெபிப்போம். 

ஜுலை 09 பணித்தளங்களில் நடைபெற்ற விடுமுறை வேதாகமப் பள்ளி ஊழியங்களின் மூலமாக, போஜ்புரி-1 கோட்டத்தின் 17 இடங்களில் 1320 சிறுவரையும், போஜ்புரி-2 கோட்டத்தின் 23 இடங்களில் 1470 சிறுவரையும், தொடர்ந்து, 4 ஜெம்ஸ் காப்பகங்களின் 280 பிள்ளைகளையும் மற்றும் பாபுவா ஜெம்ஸ் ஆங்கிலப் பள்ளியின் 700 மாணவர்களையும் சந்தித்து கிறிஸ்துவின் அன்பிற்குள் அவர்களை வழிநடத்த கர்த்தர் உதவிசெய்தார். விடுமுறை வேதாகமப் பள்ளியில் கலந்துகொண்ட பிள்ளைகள், கிறிஸ்துவின் அன்பில் நிலைத்திருக்கவும் மற்றும் தங்கள் குடும்பத்திற்கு விளக்காக மாறவும் ஜெபிப்போம். 

ஜுலை 10 பணித்தளங்களில், இயேசு கிறிஸ்துவை தங்கள் வாழ்க்கையின் சொந்த இரட்சகராக ஏற்றுக்கொண்டவர்கள் உடன்படிக்கையின் மூலமாக கிறிஸ்துவின் மீதான தங்கள் விசுவாசத்தை வெளிப்படுத்தினர். பெலாவன் பணித்தளத்தில் ஜெம்ஸ் சமுதாய மையக் கட்டுமானப் பணியினைத் தொடங்க உதவிசெய்த தேவனுக்கு ஸ்தோத்திரம். இப்பணிகள் வரும் நாட்களில் தடையின்றி நடைபெறவும், இப்பணித்தள மற்றும் சுற்றியுள்ள மக்கள் சந்திக்கப்படவும் ஜெபிப்போம். 

ஜுலை 11 சசராம் பணித்தளத்தில் நடைபெற்றுவரும் ஜெம்ஸ் செயல்மையக் கட்டுமானப் பணிகள் எவ்விதத் தடையுமின்றி நடைபெறவும், உத்திரப்பிரதேசம் மாநிலத்தில் ஊழியத்திற்கு உண்டாயிருக்கும் எதிர்ப்புகள் மாறவும், அங்குள்ள விசுவாசிகள் ஆவிக்குரிய வாழ்க்கையில் நிலைத்திருக்கவும் ஜெபிப்போம். 

June 2025

                                                        மேற்கு மண்டலம்

* பணித்தளங்களில் நடைபெற்ற விடுமுறை வேதாகமப் பள்ளி ஆசிரியர் பயிற்சி வகுப்புகளை கர்த்தர் ஆசீர்வதித்தார். ஏப்ரல் 19 அன்று போஜ்புரி-1 கோட்டத்திலும் மற்றும் ஏப்ரல் 30 அன்று போஜ்புரி-2 கோட்டத்திலும் நடைபெற்ற பயிற்சி வகுப்புகளில் 75 பேர் கலந்துகொண்டனர்.

*  போஜ்புரி -2 கோட்டத்தின் சூர்யபுரா பணித்தளத்தில் நடைபெற்ற வட்டாரப் பெண்களுக்கான சிறப்புக் கூடுகையில் 120 பெண்கள் பங்கேற்றனர். இக்கூடுகையில், சகோதரி ஜெயந்தி கர்த்தருடைய வார்த்தையைப் பகிர்ந்துகொண்டார். தொடர்ந்து, போஜ்புரி-1 கோட்டத்தின் பாபுவா பணித்தளத்தில் நடைபெற்ற பெண்களுக்கான கூடுகையில் 150 பெண்கள் பங்கேற்றனர்; Dr. லீனா மற்றும் Dr. பிரீனா ஆகியோர் இக்கூடுகையின்போது கர்த்தருடைய வார்த்தையைப் பகிர்ந்துகொண்டு, வாழ்க்கைக்கடுத்த ஆலோசனைகளையும் வழங்கி, ஜெபத்தில் வழிநடத்தினர். பங்கேற்ற ஒவ்வொருவருக்கும் இக்கூடுகைகள் ஆவிக்குரிய விதத்திலும் மற்றும் வாழ்க்கைக்கேற்ற வழிகாட்டுதல்களிலும் ஆசீர்வாதமாக அமைந்தன. 

*  தியோஹலியா பணித்தளத்தில் நடைபெற்ற சுத்திகரிப்புக் கூட்டத்தில் மொகனியா பணித்தளத்தைச் சுற்றியுள்ள பல்வேறு சபைகளைச் சேர்ந்த 200 விசுவாசிகள் பங்கேற்று ஆசீர்வதிக்கப்பட்டனர்; சகோ. வின்சென்ட் ஜெயராஜ் இக்கூட்டத்தில் கர்த்தருடைய வார்த்தையைப் பகிர்ந்துகொண்டு, பங்கேற்றவர்களுக்காக ஜெபித்தார். பாதங்கழுவுதல் மற்றும் கர்த்தருடைய பந்தியுடன் கூட்டம் நிறைவுற்றது. ஆவிக்குரிய வாழ்க்கையின் வளர்ச்சிக்கும், சுத்திகரிப்புக்கும் மற்றும் உன்னத நிலையினை நோக்கிய பயணத்திற்கும் இக்கூடுகை உதவிபுரிந்தது.

*  Rahab மற்றும் Our People Project இல்லப் பிள்ளைகளுக்கு உள்ளாடைகள், காலணிகள் மற்றும் பள்ளிப் பைகளை வழங்க கர்த்தர் உதவிசெய்தார். 

*  போஜ்புரி -1 மற்றும் போஜ்புரி -2 கோட்டங்களில், கிறிஸ்துவை தங்கள் வாழ்க்கையின் சொந்த இரட்சகராக ஏற்றுக்கொண்டவர்கள், கிறிஸ்துவின் மேலுள்ள தங்கள் விசுவாசத்தை உடன்படிக்கையின் மூலமாக உடன் விசுவாசிகளுக்கும் மற்றும் சபைக்கும் வெளிப்படுத்தினர்.

*  சசராம் பணித்தளத்தில் நடைபெற்றுவரும் ஜெம்ஸ் செயல் மையக் கட்டுமானப் பணிகளுக்காகவும், பெலாவன் பணித்தள ஆலயக் கட்டுமானப் பணிகள் விரைவில் தொடங்கப்படவும், பணித்தளங்களில் நடைபெறவிருக்கும் விடுமுறை வேதாகமப் பள்ளி ஊழியர்களுக்காகவும் மற்றும் உத்திரப்பிரதேசம் ஊழியங்களில் உண்டாயிருக்கும் தடைகள் நீங்கவும், எதிர்ப்புகள் மாறவும் ஜெபிப்போம்.

May 2025

மேற்கு மண்டலம்

• ஏப்ரல் 14 முதல் 16 வரையிலான நாட்கள் ராஜ்கிர் பணித்தளத்தில் நடைபெற்ற மண்டல முகாமில் ஜெம்ஸ் சமூக பராமரிப்பு ஊழியர்கள் குடும்பமாகப் பங்கேற்றனர். இம்முகாமில் 

சகோ. வின்சென்ட் ஜெயராஜ், சகோ. பெஞ்சமின் மற்றும் சகோதரி சஜிலா நார்டன் ஆகியோர் கர்த்தருடைய செய்தியைப் பகிர்ந்துகொண்டனர். ஆராதனை, தேவ செய்தி மற்றும் விளையாட்டுகள் என முகாமின் ஒவ்வொரு பகுதியும் பங்கேற்ற ஒவ்வொருவருக்கும் ஆசீர்வாதமாக அமைந்தன. 

•   கோச்சஸ் பணித்தளத்தில் ஏப்ரல் 10 அன்று நடைபெற்ற பெண்களுக்கான சிறப்புக் கூடுகையில் சகோதரி ஜெயந்தி கர்த்தருடைய வார்த்தையைப் பகிர்ந்துகொண்டார். சுமார் 120 பெண்கள் இக்கூடுகையில் கலந்துகொண்டனர். 

•     ஏப்ரல்  12  அன்று  சசராம் பணித்தளத்தில் நடைபெற்ற வாலிபர்களுக்கான சிறப்புக் கூடுகையில் 400 வாலிப சகோதர சகோதரிகள் பங்கேற்றனர். சகோ. பிரவீன் கர்த்தருடையச் செய்தியைப் பகிர்ந்துகொண்டதுடன், வாலிபர்களின் வாழ்க்கைக்கேற்ற நடைமுறை ஆலோசனைகளையும் வழங்கி, ஆவிக்குரிய வாழ்க்கையிலும் பெலப்பட வழிநடத்தினார். வாலிபத்தின் பல்வேறு கேள்விகளுக்கு விடையளிக்கும் வண்ணம், ஜெம்ஸ் வாலிபர் ஊழியர்களின் மூலமாக பல்வேறு சிறப்பு நிகழ்ச்சிகளும் நடைபெற்றன. 

•      வரும்    நாட்களில்  பணித்தளங்களில்  நடைபெறவிருக்கும் விடுமுறை வேதாகமப் பள்ளி ஊழியங்களுக்காகவும், விடுமுறை வேதாகமப் பள்ளியில் கலந்துகொள்ளவிருக்கும் சிறுவர் சிறுமியர் மற்றும் அவர்களது பெற்றோர்களின் இரட்சிப்பிற்காகவும், சசராம் பணித்தளத்தில் கட்டப்பட்டுவரும் ஜெம்ஸ் செயல் மையக் கட்டுமானப்பணிகள் எவ்விதத் தடையுமின்றி திட்டமிடப்பட்ட நாட்களில் கட்டிமுடிக்கப்படவும், பெலாவன் பணித்தள ஆலயக் கட்டுமானப் பணிகளுக்காகவும், பர்ஹேரி பணித்தளத்தில் ஆலயம் கட்டுவதற்கான நிலம் விரைவில் வாங்கப்படவும் மற்றும் உத்திரப்பிரதேசம் மாநில ஊழியங்களில் உண்டாயிருக்கும் தடைகள் நீங்கவும், விசுவாசிகள் விசுவாசத்தில் நிலைத்திருக்கவும் ஜெபிப்போம்.